GWEINIDOGION Y DU SY'N GWEITHREDU MEWN MEYSYDD DATGANOLEDIG
020 - Rheoliadau Anifeiliaid ac Iechyd Anifeiliaid, Bwyd Anifeiliaid a Bwyd, Planhigion ac Iechyd Planhigion (Diwygio) 2022 [Saesneg yn unig] Dyddiad gosod yn Senedd y DU: 20 Hydref 2022
Sifftio
Yn destun gwaith sifftio yn Senedd y DU?	Amherthnasol
Y weithdrefn:	Cadarnhaol drafft
Dyddiad trafod gan Bwyllgor Offerynnau Statudol Ewropeaidd Tŷ'r Cyffredin	Amherthnasol
Dyddiad trafod gan Bwyllgor Craffu ar Is-ddeddfwriaeth Tŷ'r Arglwyddi	Amherthnasol
Dyddiad y daw'r cyfnod sifftio i ben yn Senedd y DU	Amherthnasol
Memorandwm Cydsyniad Offeryn Statudol (SICM) o dan Reol Sefydlog 30A (oherwydd eu bod yn diwygio deddfwriaeth sylfaenol)	Dim angen
Gweithdrefn graffu
Canlyniad y broses sifftio	Amherthnasol
Y weithdrefn	Cadarnhaol drafft
Dyddiad trafod gan y Cydbwyllgor ar Offerynnau Statudol	2 Tachwedd 2022
Dyddiad trafod gan Bwyllgor Offerynnau Statudol Tŷ'r Cyffredin	Anhysbys
Dyddiad trafod gan Bwyllgor Craffu ar Is-ddeddfwriaeth Tŷ'r Arglwyddi	1 Tachwedd 2022
Cefndir Bwriedir i'r Rheoliadau hyn gael eu gwneud gan Lywodraeth y DU o dan adran 8(1) o Ddeddf yr Undeb Ewropeaidd (Ymadael) 2018, a pharagraff 21 o Atodlen 7 iddi. Crynodeb Mae’r Rheoliadau hyn yn cynnig diwygio cyfraith yr Undeb Ewropeaidd a ddargedwir mewn perthynas â rheolaethau swyddogol ar fewnforion i Brydain Fawr o anifeiliaid a chynnyrch anifeiliaid, a chynnyrch planhigion (gan gynnwys bwyd) yn ogystal â rheolau am iechyd a lles anifeiliaid, a rheolau ar farchnata deunyddiau plannu a lluosogi, yn dilyn ymadawiad y Deyrnas Unedig â’r Undeb Ewropeaidd. Bwriad y diwygiadau yw sicrhau bod y cyfreithiau’n gweithredu’n effeithiol yn y cyd-destun domestig er mwyn diogelu iechyd pobl ac anifeiliaid. Er enghraifft, mae’r Rheoliadau: - Yn gwneud darpariaeth ynghylch cosbau am fethu â chydymffurfio â rheoliadau iechyd planhigion. - Pan fydd yr awdurdod priodol yn gallu gweithredu fel awdurdod cymwys i gynnal rheolaethau swyddogol, ni fydd angen mwyach i'r awdurdod priodol ddynodi ei hun yn awdurdod cymwys (yn hytrach, bydd yr awdurdod priodol, yn ddiofyn, yn awdurdod cymwys). - Yn trosglwyddo swyddogaethau o'r Comisiwn Ewropeaidd i awdurdodau priodol domestig. Er enghraifft, rhoddir pwerau i awdurdodau priodol (Gweinidogion Cymru, yng Nghymru) wneud rheoliadau i reoli risgiau bioddiogelwch (ond nid oes gorfodaeth i wneud hynny). - Ymestyn y cyfnodau trosiannol sy'n ymwneud â rheolaethau swyddogol i ganfod rhai sylweddau a gweddillion mewn cynhyrchion o darddiad anifeiliaid a fwriedir i'w bwyta gan bobl. Datganiad gan Lywodraeth Cymru Mae Cynghorwyr Cyfreithiol y Senedd yn cytuno â'r safbwynt cyffredinol a nodir yn natganiad Llywodraeth Cymru dyddiedig 21 Tachwedd 2022 ynghylch effaith y Rheoliadau hyn. Fodd bynnag, nid yw'r datganiad ysgrifenedig yn rhoi enghreifftiau ymarferol (fel y rhai a roddir uchod) o'r newidiadau a wneir gan y Rheoliadau hyn. Mae'r Rheoliadau hyn yn gwneud newidiadau pwysig i'r gyfraith ar anifeiliaid ac iechyd anifeiliaid, bwyd anifeiliaid a bwyd, planhigion ac iechyd planhigion, ond fe’u disgrifir yn y ffordd fwyaf cyffredinol a lefel uchel yn unig yn y datganiad ysgrifenedig. Dylid nodi hefyd y tynnwyd y fersiwn wreiddiol o’r datganiad hwn yn ôl, felly mae’r datganiad hwn yn fersiwn wedi’i hailosod. Mewn perthynas â’r fersiwn wreiddiol, fe wnaeth y Pwyllgor Deddfwriaeth, Cyfiawnder a’r Cyfansoddiad ysgrifennu at Lywodraeth Cymru yn codi pryderon nad oedd y datganiad gwreiddiol yn darparu eglurhad defnyddiol o’r hyn y mae’r Rheoliadau yn eu gwneud mewn gwirionedd. Nid yw’r datganiad wedi’i ailosod yn darparu eglurhad defnyddiol chwaith. Cytundeb Rhynglywodraethol ar Fil yr Undeb Ewropeaidd (Ymadael) Mae'r crynodeb uchod a chynnwys y Memorandwm Esboniadol i'r Rheoliadau hyn yn cadarnhau eu heffaith. Nid yw Cynghorwyr Cyfreithiol y Senedd o'r farn bod unrhyw faterion arwyddocaol yn codi o dan baragraff 8 o'r Memorandwm ar Fil yr Undeb Ewropeaidd (Ymadael) a Sefydlu Fframweithiau Cyffredin mewn perthynas â'r Rheoliadau hyn. Cynnig cydsyniad o dan Reol Sefydlog 30A.10 Gosododd Llywodraeth Cymru Femorandwm Cydsyniad Offeryn Statudol gerbron y Senedd ar 21 Tachwedd 2022, gan fod y Rheoliadau yn diwygio deddfwriaeth sylfaenol o fewn cymhwysedd deddfwriaethol y Senedd (yn yr achos hwn, adran 29 o Ddeddf Amrywogaethau Hadau a Phlanhigion 1964). Mewn llythyr at y Pwyllgor Deddfwriaeth, Cyfiawnder a’r Cyfansoddiad a Phwyllgor yr Economi, Masnach a Materion Gwledig dyddiedig 21 Tachwedd 2022, dywedodd Lesley Griffiths AS, y Gweinidog Materion Gwledig a Gogledd Cymru, a’r Trefnydd, nad yw’n bwriadu cyflwyno cynnig i gynnal dadl ar y Memorandwm Cydsyniad Offeryn Statudol yn y Cyfarfod Llawn.